साथ माझी प्रिये आज का सोडली ?
जेथ मी जायचो यावया तूं हवे
आज तूं मात्र मज का न नेले सवे ?
एकतेची शपथ आज का तोडली ?
झुंजलो जीवनाशी सदा जोडिने
सुख असो दु:ख वा सोशिले गोडिने
आज खेळी हि अर्ध्यात का सोडली ?
कितिक नावे तुझी, ‘ओ’ तरी यायची
शीळ मी घालता साद तू द्यायची
का सखे ही प्रथा आजला मोडली ?
एकही दिवस ना बोलणे सोडले
सलग हे आठ दिन मौन का धारले ?
त्याच मौनात मग का कुडी सोडली ?
साथ माझी प्रिये आज का सोडली?
कोणत्याही टिप्पण्या नाहीत:
टिप्पणी पोस्ट करा