‘मदहोशी’

जागे नको करू ना, स्वप्नात राहु दे
धुंदीत वारुणीच्या ही रात जाउ दे

अधरातली तुझ्या दे मदिरा अजून थोडी
प्याल्यातल्या सुरेला येते तिची न गोडी
हा मख्मली करांचा काढू नकोस विळखा
झुलुपात रेशमी या गुंतून राहु दे
धुंदीत वारुणीच्या ही रात जाउ दे

हळुवार चुंबुनीया उघडवु नकोस डोळे
प्रतिबिंब तव मुखाचे मी बंद त्यात केले
राणी तुझ्या मिठीने उबदार या निशेची
जादुभरी खुमारी वाढून राहु दे
धुंदीत वारुणीच्या ही रात जाउ दे

गातील पाखरे गे जेव्हा पहाट गाणी
अन दीप चांदण्यांचे मंदावतील राणी
उमलूनिया कळ्यांची होतील फुले तेव्हा
झुळुकेस गंध त्यांचा घेऊन येवु दे
धुंदीत वारुणीच्या ही रात जाउ दे