घर सजणाचे

घर सजणाचे कौलारू पण मज ते राजमहाल
..घर सजणाचे...

ही खोली छोटी चौकोनी, जशी कुशल कुणि अभिनयराज्ञी
अंकाअंकामधे भूमिका बदले कौशल्यानी.
ही होते दरबार सकाळी, रात्री रंगमहाल
..घर सजणाचे...

जेथे होते बसणे उठणे, अन आठवणींमधी हरवणे,
जिथुन पियाच्या वाटेवरती डोळे लावुन बसणे
ती चौपाई मजला करते शाही तख्त बहाल
..घर सजणाचे...

साजन माझा राजन आणि मी या साम्राज्याची राणी,
आसुसलो ऐकाया युवराजाची लाडिक वाणी.
दुडदुडत्या पदस्पर्शासाठी आतुर सर्व महाल
..घर सजणाचे...