बाळाची चाहूल

बैस रे प्रिया जरा बिलगुनी असा मला
ऐक लक्ष देउनी काय सांगते तुला

वाटते मलाच की मी जरा जडावले
त्रासदायि भासते उचलणेहि पावले

सूज पावलांवरी वाटतेय का जरा?
उचमळून येतसे जीव होइ घाबरा

काळजी जरा जरा अशी उरात दाटते
कंच कैरि आणि चिंच खाविशि रे वाटते

सांगतात या खुणा काय? तुज कळेल का?
कसे अजाण रे तुम्ही? आम्हीच सुज्ञ बायका

प्रिया, अरे हि लक्षणे आई मी बनायची
स्वप्न, पिता व्हायचे, तुझे खरे ठरायची.

अरे, अरे, पुरे, पुरे, नको करूस नर्तना
बघेल बाळ आतुनी तुझा उतावळेपणा