वनमोर नाचतो अन फुलते धरा कणांनी
डोळयात आजला का येते भरून पाणी?
पाऊस भरुनि आला अन सांजवेळ झाली
अंधारल्या दिशांची दुभरी मनेही झाली
का गंधहीन आहे रंजीस रातराणी?
डोळयात आजला का येते भरून पाणी?
गेलास दूरदेशी, सखि एकटी जहाली
बाळांस वाढताना बघण्यात गर्क झाली
हळव्या क्षणी परंतु स्मरते तुझीच गाणी
डोळयात आजला का येते भरून पाणी?
दाटून कंठ आला, अन् बोल बोलवेना
सारंगिच्या सुरांची ती आर्तता रुचेना
आषाढपावसाने का चिंब ही विराणी?
डोळयात आजला का येते भरून पाणी?
१४ जून २००९
याची सदस्यत्व घ्या:
टिप्पणी पोस्ट करा (Atom)
कोणत्याही टिप्पण्या नाहीत:
टिप्पणी पोस्ट करा