१९ मे २००९

चिरे पाहिले बुरुजाचे

चिरे पाहिले बुरुजाचे ते ढासळले होते
भगदाडांमधि रक्त गडाचे साकळले होते

गतकाळाचा वर्तमान अन् भविष्य जाणवुनी
धैर्य जणू बेलाग गडाचे त्या ढळले होते

गद्दारांनी स्वार्थापोटी विवरे खोदुनिया
मुल्क जाळण्या पलिते नंतर पाजळले होते

समरामध्ये नररत्नांनी जरि केली शर्थ
साम्राज्याचे लयास जाणे ना टळले होते

कर्तबगाराच्या पुत्राने थोडे सावरले
सावरले पण पाश तोवरी आवळले होते

दिमाखात फर्फरणार्‍या त्या भगव्या झेंड्याच्या
जरिपटक्याचे कापड एव्हाना मळले होते

कोणत्याही टिप्पण्‍या नाहीत:

टिप्पणी पोस्ट करा